Hier is 'n paar gedagtes oor dié komplekse onderwerp:
Ekseem is meer as net 'n veltoestand, aangesien dit ’n groot uitwerking op lewenskwaliteit het. Hierdie toestand is so uiteenlopend in die manier waarop dit manifesteer, sowel as in die onderliggende oorsake, dat 'n mens dit amper nie 'n enkele toestand kan noem nie.
Wat die fisiese voorkoms daarvan betref, kan dit wissel van 'n ligte tot matige jeuk tot 'n uiters jeukerige, pynlike en aftakelende toestand. Die toestand verskil baie tussen verskillende ouderdomsgroepe en vertoon verskillend lyk by babas/kinders en tieners/volwassenes.
Stres is by byna alle gevalle van ekseem betrokke. Dit is dus baie belangrik om stresvlakke te probeer verlaag.
Hiervoor sal olies soos kamille, bergamot, laventel, melissa en neroli nuttig wees.
Dit kan in massering gebruik word, of daagliks by 'n bad gevoeg word. Wanneer kinders ekseem het, kan hulle dikwels op die ouers se spanning reageer, en dit is dikwels belangrik om een of albei ouers sowel as die kind te behandel.
Sommige vorme van ekseem is allergies van oorsprong en omdat daar 'n verband tussen stres en allergie is, is dit weer belangrik om alles moontlik te doen om stresvlakke te verlaag, terwyl ook bepaal word watter allergene die toestand vererger.
Soms kan ekseem gesien word as 'n poging deur die liggaam om van opgehoopte gifstowwe deur die vel ontslae te raak. Dit gebeur dikwels waar die dieet swak was, of baie bymiddels soos perserveermiddels bevat het.
Ons gaan soms deur tye wanneer ons vars kos en water afskeep, of in emosioneel toksiese of stresvolle tye is. 'n Kort vas (een dag lank) of reinigende dieet (voeg net baie waterige vrugte by en verminder swaar kos) kan onderneem word. Wanneer jy dit doen, kan die ekseem tydelik vererger namate die liggaam meer afval begin uitskakel.
In alternatiewe medisyne word dit 'n "genesingskrisis" genoem. Probeer om deur hierdie tydperk te kom deur te rus en gesond te eet en genoeg water te drink.
Juniper is miskien die belangrikste olie om te gebruik wanneer jy probeer om te ontgif, en dit is goed om te weet dat dié olie ook emosioneel reinig waar daar negatiewe belewenisse is.
Vir direkte behandeling van die vel is kamille-essensiële olie (Roman chamomile essential oil) baie nuttig. Vir sommige mense (hoewel nie die meerderheid nie) is melissa 'n beter keuse. Melissa is baie gekonsentreerd en moet in 'n 0,5% of 1% verdunning gebruik word. In hierdie klein hoeveelhede kan dit 'n baie goeie effek hê op selfs hardnekkige ekseem.
Vir ekseem kan 'n mens die olie in 'n koel waterige basis meng, aangesien baie mense met ekseem vind dat die draer-olies te swaar is, en selfs die toestand vererger. Dit kan goed werk om die essensiële olie in ’n bietjie Aloe Ferox gel te meng, aangesien dit koel, strelend en ook anti-inflammatories is.
Bergamot, malva en laventel is ander olies wat gebruik kan word, maar in elke geval kan 'n bietjie eksperimentering nodig wees, aangesien dit so 'n individuele, en onvoorspelbare toestand is.
Battaglia beveel die volgende aan:
• 'n Dieet ryk aan omega-3-vetsure.(okkerneute, avokadopere, vis soos salm en tuna, brusselse spruitjies, eiers)
• Sluit hoë kwaliteit koudgeparste sonneblom, saffloer of lynsaad by die dieet in. (sunflower, safflower, linseed)
• Vermy suiwel, suiker, verfynde kosse, vette, gebraaide en verwerkte kosse.
Terminologie: 'detoks'.
'Detoks' het ’n baie groot modewoord geword, en kan 'n verwarrende onderwerp wees. Ek vind dat die liggaam homself in die algemeen skoonmaak as jy ophou om hom te oorlaai!
Ek verkies langer periodes van 'detox' in plaas van 'n vreeslike drie dae van net dit of dat drink en amper niks eet nie.
Verander geleidelik na minder koffie, tee, rooivleis, suiwelprodukte en suiker oor 'n tydperk van byvoorbeeld 'n maand, en vervang dit gelyktydig meer groente, vrugte, rooibostee en water.
Ek is te veel van ’n lekkerbek om sjokolade en braaivleis die trekpas te gee....
Uiteindelik is 'n permanente lewenstyl- en eetstylverandering die idee - nie om jouself kort-kort vir 'n paar dae op 'n onvolhoubare rigiede program te straf nie....
Sommige mense het ook begin om hulself en hul kinders van skermtyd af te 'ontgif', aangesien baie dinge waarna ons (en ons kinders) kyk nie bevorderlik is vir ontspanning en geestesgesondheid nie.
Bron:
Davis, P.
Aromatheray A-Z
The C W Daniel Compay, Essex, Engalnd, 1988
P115-116
Bron:
Battaglia, S.
The complete guide to aromatherapy, 2 nd edition.
The International Centre of Holistic Aromatherapy, Brisbane, Australia, 2003
p 468.